Mat 6 | MCQ | STEP | Ja hami vwiha'avara ea 'ahopuni nia 'ahi pu ki'avarono ja joni 'unama ka'ene arimaiji ve'ava. Ja ijá ve'avajaho joni Oma ka'ene kahi akúpa 'ahi hinujaho ja eha pamihuna.

Matthew 6

Vajihi'ina Rehuna Najahajina

1 Ja hami vwiha'avara ea 'ahopuni nia 'ahi pu ki'avarono ja joni 'unama ka'ene arimaiji ve'ava. Ja ijá ve'avajaho joni Oma ka'ene kahi akúpa 'ahi hinujaho ja eha pamihuna. 2 Ja ura ea uneunecha pa'amaiji swara vaji'irono ve'avajaho ja ea mapoka ni'i ni'i ki'avaroreje nipia apena hwasi'ava. Ijihuni maijaho ea ka'ene ira'asinijipo Sinakoku vaja 'ee ma'ahi riri kaji ani ani vejakame ea 'ahopo pu ta'arora'avarono ija'ina vejura. Na niho'o nimaa nimai ja 'waravu. Pu puni eha niapejara. 3 'Enakúne ja ea swara vaji'i ve'avajaho paveje joni mana'inijara raka ka'ene venujaho joni ani'inijaho ka'amana. 4 'Enakúne ja ea uneunecha pa'amaiji swara vaji'iro ve'avajaho hemi vajihakame joni Oma ka'ene hemi kimujara eha vaji'amana.

Siporu 'Ohuna Najahajina

(Ruku 11:2-4)

5 'Enakúne ja siporua 'o'i ve'avajaho ja ea ka'ene ira'asinijipo vejuja'ina'e pave'avara. Pu niho'o Sinikoku vaja 'ee ma'aha riri namine siporua 'ojura. Ruha ka'ene ea mapoka ni'i ni'i kihuni tinijiano namine ojura. Na niho'o nimaa ja 'waravu pu puni eha niapejara. 6 'Enakúne ja siporua 'o'iro ve'avajaho va'e joni sei vaji va'e vwicha ku'i kaivo joni Omijihuni siporua 'o'avara. Ijihuni maijaho ja ijí ruha hemi siporua 'oju'e kimujara Hu joni eha mihuna. 7 'Enakúne ja siporua 'o'avajaho ja hine vu'a nikwinu'ina kaji hura hara pa'oji'i na'avara. Jenitaruepo Hu henarena roji'i vu'a nikwinu'ina kaji apena hura hara 'oji'i navura. 8 Ja ijí ea kajipo vejuja'ina'e pave'avara. Ijihuni maijaho ja raka pivusahare'e Amo jari'iro vejujija ja mai'o pajarivi'ini Hu nihena kimuna.

9 'Enakúne siporua ika'ina 'o'avara. Amo akúpi 'ahi hino ese. Oni iha niho'o nimaa nimai'omo A veje nú Oni iha ta'aroraha. A roa nú 'ajohua hina. 'Ene oni ura ijara akúpa 'ahi venuja'ina'e mwe'a 'u'o ija'ina'e venama. 'Iruma iviasi areri ihuniji vajúha. Ea nú sise'i 'ahúu'e nú vwihana 'arevuja'ina'e nú 'u'o A sise'i 'ahaukúne A vwihana 'arema. Nú niho'o sisea vwihanare'e oja 'urinukúne A 'ajohue ni'ajúhe nú sisea paveja. A 'ajohu'ina. A ajira rukina. Oni iha ni'ima'ura. A majama ija'ina. Amo ese. Nijina.
14 Ijihuna'e ja ea 'ahopuni sisea vwihana are'avajaho joni Oma ka'ene akúpa 'ahi hinujara jona 'u'o vwihana arehuna. 15 'Enakaivo ja ea 'ahopuni sisea pavwihana are'avajaho joni Omiji 'u'o joni sisea pavwihania arehuna.

'Aura Arehuna Najahajina

16 'Enakúne jara 'aura are'avajaho era ki'avarono ura nia paajurasahe o'avara. Areri ea ka'ene ira'asinijipo vejuja'ina'e pave'avara. 'Eju'ukame eaka mapokijipo kima henareje pu 'aura arevara ro'avarono avajura. Na niho'o nimai ja 'waravu. Pu puni eha niapejara. 17 'Enakúne ja 'aura are'avajaho joni ura nia some tuvaria pijahe matausahe o'avara. 18 'Ejakame jara 'aura ka'ene arevajaho ea hena ki'avara. 'Ejakame joni Amo ka'ene uneunecha mapoka hemi kimujara eha samai vajihuna.

Akúpa 'Ahi Kukua Rukina Rehunijina

(Ruku 12:32-34)

19 'Ene uneunecha ka'ene mamaijija ikaho mwe'a paahuma irechama hi'avara. Ijihuni maijaho soapo ine 'ee kapurapo 'uhusame 'ee ea ka'ene nesa apeji'inijipo nesi tirasame aruma va'e nesi 'ekahuna. 20 'Enakúne joni uneunecha maa kajija kahino akúpa 'ahi ahume irechava na'avara. 'Ejakame soa 'ee kapura pa'uhusame 'ee ea nesa pa'ekahuna. 21 'Ejakame joni uneunecha mamaa kajipo ruha ka'ene navu kajino joni oja 'u'o ijí nahuna.

Haha Huni Hanaji'ina

(Ruku 11:33-36)

22 'Enakaivo joni niijaho areri joni hahaka mapoka kajihi hananii'ina. 'Ena'omo joni nia kajara marana paranujaho joni hahaka mapokijaho hanana paranu. 23 'Enakaivo joni nia sisera'amajaho joni hahaka mapokijija niho'o nutuma namu. 'Ejakame ijí hanaji'ina ka'ene joni vaji namujara nutu'amajaho niho'o ni'ima'ura nutuhuna.

Godine 'Ee Kukua

(Ruku 16:13, 12:22-31)

24 Ea kwinu'wi huni mama'ina no'ohe'i rehuna niho'o areri pana. Hu ea pina oja ma'i kaivo ea pina sise'i 'ahahuna. 'Ene ea pina niho'o ura rena para'i kaivo ea pina ka'amajaho sema parahuna. Godi oja mahe 'ee monia oja 'u'o ahuma mahuna areria pana. 25 Ijihuna'e Na ja 'waravukúne jara ichá'ina ka'ene hihunijaho pavwiha'avara. Ja ika'ina pavwiha'avara nú 'iruma 'ee toa iraki i'eja pa'wa'avara. 'Enakaivo nú 'iruma 'ee toa iraki i'eja pavwiha'avara. 'Ú 'irumijara ni'ina kaivo hiijaho pana raka? 'Ee atehijipo ni'ina kaivo hahijaho pana raka? 26 'Enakúne ikaho vwihaha. Uka ka'ene jaijasaha oju kivujija pu niho'o puni 'ina pa'one 'ee puni 'iruma pa'eke rira kwino ahuma irechavura kaivo joni Oma ka'ene kahi akúpa 'ahi hinujara 'iruma vajihu. 'Enakaivo ja Godoni una'ijaho uka niho'o asitaha parajara. 27 A ea irara hine vwihananavi'i temuka ape'amajaho 'ú ijí temuka kajara veje oni hia vea pina kú'o huri ranave hiva'ena? 28 Ja rakijihuna'e ateharu vwihajo? Ike vwihaha! Sinara ka'ene nechi 'urijajija ma opuipo 'urijura kaivo pu opu'ina paharura vene 'ee opu'ina majikaria pamarasahura. 29 'Enakaivo na nimaa nimaa ja 'waravu. Saramani oni pinana ichutoi namajaho huni haha sarira 'enana kaivo ijí hura sarira ka'ene 'enajaho areri sinara puni nia vaja'e kimujaho paasimana. 30 Ike sinarakija iviasi rena navu. 'Ena'omo niari uhakivi'i 'ekareje veni jae rehuna. Sinara ka'ene nia vaja ija'ina kivujija Godira veju'e niija'ina rejura. 'Enakaivo Godira veju'e sinara marasahu kaja'ina'e 'ú Hu areri jona ija'ina pave'ena? Ea ka'ene joni nimairoa ma'u'umai kihije? 31 'Enakúne ja hine ichá'ina'e hihuni 'unamiji saravujaho are'avara. Nú iraki i'eja? 'Ee toa iraki i'eja? 'Ene ateha iraki samo'eja? 'Ene atehaka apúsahunijaho ichihi rena rohunijaho pavwiha'avara. 32 Ike uneunecha kijahija Jenitaruepo vwihana vejura. 'Enakaivo joni Oma ka'ene kahi akúpa 'ahi hinujara uneunechaka mapoka ka'ene ja pivusahujija nihe paranuna. 33 'Enakaivo ja maraku'a Huni ara 'unamiji 'ee Huni 'unama ka'ene ariramaiji saravakame iji'a uneunecha ka'ene mwe'akaki jara pivusahujaho Hura vajihuna. 34 Niari raka ka'ene rehunijaho pavwiha'avara. Ijihuni maijaho niara huni ahijijaho niarahuna. Vea kwinu kwinu puni ahija 'oi'oi navu.